Cricket Association of Mizoram kan ground neih chhun a hma aia ṭha lehzual zawka buatsaihna leh BCCI domestic tournament (Mipa team home match) ṭhenkhat thlen ngei theihna atan chak takin hma a la mek.
CAM in ground a neihchhun Suaka Cricket Ground (SCG), Sihhmui chu pitch pakua leh ground bula practice pitches te cheiṭhat hna ngawrh taka thawh mek a ni.
Hei bakah hian tournament thlen theih nana ṭul leh mamawh dang te pawh theihtawpa buaipui mek a ni bawk.
He mi chungchang ah hian BCCI lama mithiam te thurawn lak niin, an thurawn anga kalpui a ni.
Hemi atan hian BCCI Chief Curator Pu Ashish Bowmik-a kaihhruaina anga ruahhmanna siam niin Assam lei (soil) hman a ni.
Hnathawh mekah hian grass te phun zawh tawh niin, grass te hi ṭha taka ṭo tir tura buatsaih mek a ni a; vil uluk leh duật hunlai tak anih angin fimkhur taka enkawl a ni.
Center pitch number 4, 5 & 6 te hi BCCI domestic tournament khelhna tura ruahman niin, pitch number 1, 2, 3, 7, 8 & 9 te hi CAM tournament khelhna tura ruahman a ni bawk.
Pitch te hi inches hniha chhahin soil te hi thlak a ni a,
pitch soil tur hian ton 70 chuang (truck lian trip 2 ) lei a ni a, pitch khuh turin (feet 50 x 100) GSM pitch cover 3 lei a ni bawk.
Pitch siam hna hi labour mi 24 te’n ni 15 chhunga thawh a ni.
BCCI domestic tournament kan thlen theihna tur hian BCCI hnuaia Technical Team te leh Management team te’n a hran ve ve in inspection an la rawn nei dawn bawk a ni.