BCCI hnuaia Ranji Trophy Plate Group match hnihna chu ni 25-28 khan khelh niin Mizoram chuan Arunachal Pradesh chu Innings khat leh run 58-in a hneh. Champhai Tlangval, Lalrempuia’n wicket 8 a la!
Gujarat College Cricket Ground-A, Ahmedabad-a inkhelah hian Mizoram Toss-ah chakin vawm hmasak an thlang a. 1 Innings- Arunachal Pradesh lamin 187 siamin an out vek a. Mizoram tan Lalrempuia’n Wicket 3 a la a, K. Vanrotlinga leh Bobby Zothansanga te’n wicket 2 ve ve lain Outstation player KC Cariappa leh CA Karthik te’n wicket 1 ve ve an la bawk.
Mizoram-in over 115 chhungin run 389 siamin wicket 6 an hloh a, an innings an duhtawk (declared) a. Outstation player Armaan Jaffer-in run 144 a siam a. Debutant pathum – Sahil Reza (65), F. Vanlalmuanzuala (55*) leh K. Vanrotlinga (25*) te’n an thawhhlawk hle. Captain Joseph Lalthankhuma’n run 46 siamin Vice Captain Jehu Anderson pawhin run 36 a siam bawk.
2nd Innings-ah Arunachal Pradesh lamin bat ve lehin run 144 chiah siamin an all out a, 1st Innings nena belhkhawm pawha Mizoram run pawh siam an tlin theih loh avangin Mizoram chu Innings khat leh run 58 in a chak ta a ni. 1st Innings lama che ṭha tak Lalrempuia’n wicket 5 la lehin he match-ah hian Wicket 8 lai a la a ni. K. Vanrotlinga’n wicket 3 lain KC Cariappa’n wicket 2 a la bawk.
Ti hian Ranji Trophy Plate Group chu Match hnih ṭheuh khelh zawh niin Mizoram chu Table-ah pakhatnaah awmin an Match pathumna chu Lal Bahadur Shastri Stadium, Anand, Gujarat-ah Sikkim nen 1-4 November chhungin an khel leh ang.