Zemabawk Pitchers Cricket Club hruaitute sawmna angin Cricket Association of Mizoram hruaitute (Apex Council member) leh Zemabawk Pitchers CC hruaitute’n ‘Mitlamual Cricket Indoor Pitch, Zemabawk’ a cricket indoor sak zawh tawh chu February ni 1, 2025 zing hian enho a ni.

He hmun hi Smart City project hnuaia sak niin, hetah hian sawrkarin sports discipline hmunhma pathum – Cricket Indoor Pitch, Futsal Ground leh Baketball Court te a siama, a laiah indoor pitch hi dah a ni.

He inkawmkhawmnaah hian thil pawimawh hrang hrang sawiho a ni a, Zemabawk ṭhalai te mai bakah CAM hnuaia Mizoram team te leh club te tana chhawr ṭangkai anih theih dan turte, enkawl chhunzawm dan turte sawiho a ni.

He hun hi Zemabawk Pitchers Cricket Club President Dr. Vanramliana’n kaihhruaiin, club Office Bearers te pawh an kim theia, Cricket Association of Mizoram lam aṭangin Pu Lalrochuanga Pachuau, President; Pu Lalfakawma Varte, Jt. Secretary leh Pu Lalrosanga, Councillor te an tel a ni.

He project hnuaia indoor pitch hi a tirah cricket puala dah a ni loa, cricket in a chan ve ngei theih nan Zemabawk Pitchers CC hruaitute’n theihtawpin hma an la a, an hmalakna leh an inpekna hi a ropuiin, fak an phu hle a ni.

He indoor ah hian cricket pitch panga dah tum a ni a, zanah pawh hman theih tura duan a ni bawk.