BCCI hnuaia under – 19 mipa inelna sang ber Cooch Behar Trophy ah Mizoram Men’s Under – 19 Team te’n Arunachal Pradesh chu wicket riatin an hneha, ni 4 khelh turah a ni 3 na 1st session ah Mizoram Team te hi an chak a ni.
He match hi GS Patel Stadium, Nadiad, Gujarat ah khelh a ni a, Arunachal Pradesh hian thawk hmasain thawhkhatna (1st innings) ah run 181 siamin an out veka, he innings ah hian Ramhlun Venglai tlangval Johana’n wicket 7 a la.
Mizoram lamin thawhkhatna bat ve in run 92 ah an out veka, hetah hian wicket keeper Zemabawk tleirawl ‘CAM Emerging Player of the Year’ nilai Lalramluahpuia Zote chuan run siam hnem berin run 45 a siam.
Mizoram hi thawhhnihna (2nd innings) ah hian an che ṭha hle a, Arunachal hi run 112 ah an vawm out veka, hetah hian ‘CAM Junior Cricketer of the Year’ nilai Johana bawk che ṭha leh berin wicket 6 a la a, Johana hian a vaiin wicket 13 lai a la a ni.
Arunachal Pradesh target siam – run 202 hi umin, Mizoram under – 19 team te hian over 71.4 ah batsman pahnih chauh hlohin target hi awlsam takin an umphain hnehna hlu tak an chang a ni.
He target an umnaah hian Lalhlimpuia, Ainawn Veng chuab century (112*) siamin a che ṭha hle.
Hlimpuia hian ball 218 a hmachhawn aṭangin run 112 lai a siama, a tawp thlenga damin team chak nan hian a thawhhlawk takzet a ni.
Ani bakah hian Ramthar Veng tlangval F Lalnunkima chuan run 58 siamin a thawhhlawk hle bawk.
He match hi he tournament a an match khelh tur match 5 zinga a hmasa ber niin, a khelh hnihna hi Tripura nen an khawtualah November ni 13 ah an khel leh ang.
Cricket Association of Mizoram chuan Mizoram Men’s Under 19 Team player leh supporting staff te hi a lawmpuiin a chhuang takzeta, an khelh leh zel turah pawh duhsakna sang ber a hlan a ni.