Under – 19 mipa te’n nikhat aia rei (multi days format) an khelh ṭhin Cooch Behar Trophy ah Ramhlun Venglai tlangval leh ‘CAM Junior Cricketer of the Year’ nilai Johan Lalbiakkima chuan Arunachal Pradesh lakah innings 2 ah wicket 13 a la.
He match hi GS Patel Stadium, Nadiad, Gujarat ah khelh mek a ni a, ni 4 khelh turah ni 2 khelh ni tawhin ni 2 dang a la awm.
Arunachal Pradesh hian thawk hmasain thawhkhatna (1st innings) ah run 181 siamin an out veka, he innings ah hian Johana’n wicket 7 a la a ni. Mizoram lamin thawhkhatna bat ve in run 92 ah an out veka, hetah hian wicket keeper Zemabawk tleirawl ‘CAM Emerging Player of the Year’ nilai Lalramluahpuia Zote chuan run siam hnem berin run 45 a siam.
Mizoram hi thawhhnihna (2nd innings) ah hian an che ṭha hle a, Arunachal hi run 112 ah an vawm out veka, hetah hian Johana bawk che ṭha leh berin wicket 6 a la a ni.
Arunachal Pradesh in innings hnih(1st innings leh 2nd innings) a an run siam belhkhawm hi run 293 niin, Mizoram lamin 1st innings a an run siam (run 92) paihin, Mizoram lamin chak turin run 202 an siam a ngaia, tunah hian Mizoram lam hian target run 202 hi umin, run 142 (142/1) siamin mi pakhat chauh an la hloh a ni. He target umna ah hian Lalhlimpuia, Ainawn Veng in run 70* siamin a la dama, a dinpui (partner) Ramthar Veng tlangval F Lalnunkima chuan run 46* siamin a la dam ve bawk.
Tihian ni 2 khelh tur la awmah Mizoram hian run 60 chauh an siam a ngai tawha, mi 9 lai an la dam bawk avangin Mizoram Under -19 Team te chakna chance hi a ṭha ta hle a ni.