India ramchhunga cricket hmanga state te inelna sang ber leh ngaihhlut hlawh Mipa Senior Team te khelh ṭhin Ranji Trophy GS Patel Stadium, Gujarat a khelh mekah Mizoram mipa team te’n Manipur chu innings khat leh run 20 in an sawp.
Tarlan tawh angin tournament a match te hi nikhat aia rei khelh chi (multi days format) niin, a ni hnuhnung ber (day 4 ah) Mizoram Team te’n Manipur Team te hi run 246 ah an vawm out vek a ni.
Tihian Manipur ṭum 2 thawha run siam belhkhawm (270 + 246 = 516) hian Mizoram te’n thawhkhatnaa an run siam an phak lohna (trail run) hi run 20 lai a la ni a; hei vang hian Mizoram Team te hi bat ve ngai loin hneh takin run 20 leh innings 1 in an chak ta ni.
Mizoram guest player chhuanvawr Agni Chopa, ball 269 a hmachhawnah run 218 lai siamtu chu he match a ‘Man of the match’ atana thlan a ni. Chopra hian Mizoram a chakpui mai a ni loa, domestic/1st class cricket ah record a siam bawk. Hetianga record a neih ṭhat chuan Mizoram kaltlangin India aiawha a khelh phak hial beisei a ni.
Mizoram Team te hi Plate Group ah awmin – Goa, Nagaland, Sikkim, Manipur leh Arunachal Pradesh te nen an awm ho a, vawi 3 khelhah vawi 2 chakin, ṭum 2 khelh tur an la neia, he group a final luh theihna chance a ṭha ta hle bawk.
Mizoram Team te hian an match 4 na turin November ni 6 – 9, 2024 ah Goa nen Ahmedabad ah an khel anga, group match hnuhnung ber hi November ni 13 – 16, 2024 hian Nagaland nen Nadiad ah an khel leh ang.
Mizoram la tum tur Team 2 te hi Mizoram ang thoa point 13 ve ve hmu te an ni a, chuvangin inkhelh leh tur te hi final luh leh luh loh hriltu a ni dawna, final hi an lut thei anih chuan Plate Group aṭangin Elite Group ah Mizoram Team te hi an kaisang thei dawn a ni.
Cricket Association of Mizoram chuan Mizoram mipa senior team – player te leh supporting staff zawng zawngte chungah lawmthu sawiin, a chhuang takzeta, an khelh leh turah pawh duhsakna sang ber a hlan bawk a ni.