North East state a Cricket Associations paruk – Mizoram, Sikkim, Meghalaya, Manipur, Nagaland leh Arunachal Pradesh te intelkhawmna North East Cricket Development Council (NECDC) Tournament neih a ni a, he tournament ah hian state tina senior team te tirh an ni. Tournament ah hian mipa team te’n Dimapur, Nagaland a khelin, hmeichhia lamin Ri Bhoi, Meghalaya ah an khel thung ang.

Mipa tournament hi One Day format a khelh niin, ṭum hnih neihna a ni a, tournament hi September ni 29 khan khelh zawh tawh a ni a. 2nd NECDC Senior Men’s Inter-State Friendship Tournament tih niin, Nagaland chu a ṭum hnihna atan an champion a, Mizoram team chu Nagaland leh Sikkim te nen Group khatah awmin point 1 an hmu a ni.

Hmeichhe lam hi 1st NECDC Senior Women’s Inter-State Friendship Tournament tih niin, T20 format a khelh tur a ni a, September ni 30 hian khelh ṭan a ni anga, chawhnu lamah Nagaland leh Mizoram an inkhel ang. Mizoram hi Sikkim leh Nagaland te nen Group B ah an awm ho a ni.