Lunglei ah cricket ground tur ram inhlanna hun neih a ni

Cricket Association of Mizoram tana thu lawmawm leh thil chhinchhiah tlak tak ni reng tawh turin Pu C.Lalhruaimawia te unau, Lunglei Lunglawn te chuan an pa Pu C.Lalbiakchhinga (L) hriatreng nan Lunglei Lunglawn ah ram zau tak mai cricket ground atan an pe.
Heng mi inphal leh ṭhalaite hmakhaw ngai mi an awm hi cricket hmsawn nan leh ṭhalai te hmalam hun atan a hluin a ropui tak zet a ni. He thil a hlawhtlin theih nan hian Lunglei DCA hruaitute hmalakna leh inpekna hi a hluin, fak an phu hle a ni.

Ram inhlanna hun hi June ni 4, 2024 (Thawhlehni) khan Lunglei Bazar Venga Season Hotel ah neih a ni a, hetah hian CAM hruaitute, Lunglei District Cricket Association hruaitute leh ram petu/neitute chhungkua te an tel a ni.

He hunah hian CAM President Pu Lalrochuanga Pachuau chuan thusawiin ‘BCCI lamin a hrana ram leina a pek theih loh avangin cricket khelhna tura ram pe thei mi inphal an awm a ngai a, Lunglei khawchhungah hetianga mahni ram hlu tak leh zau tak ṭhalai te hmakhaw ngaia hlan thei an awm chu lawmawm a tih thu leh a ropui thu a sawi. Hemi bakah hian BCCI in Mizoram tana hma a lak mekna te a sawi bawk.’

Ram petu Pu C.Lalbiakchhinga (L) te chhungkaw aiawhin a fapa Pu C.Lalhruaimawia pawhin thu sawiin, ‘a pa hi infiammi leh ṭhalaite hmakhaw ngai mi a nih thu a sawi a, ṭhalai te’n infiamna an luhchilh chuan ruihtheihthilah an fihlim phah ṭhin thu a pa khan a damlaiin a sawifo ṭhin tih sawiin, a pa hming a daih tawh loh nana hmalakna a awm chu a inchhirawm a rin loh thu leh a pa pawhin he thil hi a duhdan anih ngei a rin thu a sawi bawk.’

Lunglei DCA President Pu Lalrotluanga pawhin ‘Heng ang hun lawmawm hman a ni thei hi a lawmzia leh a rin phak bak anih thu sawiin, ṭhalai te’n an hlawkpui ngei a rin thu sawi bawk’

Ram inhlannaah hian ram neitu fate 3 leh hriatpuitu atan Lunglei DCA President leh CAM aiawhin CAM Apex Council Member te’n hming an sign a ni.

Ram hi ground atana siam turin tunah a hranin budget a awm loh bakah dan anga CAM hminga dah te a la ngaih dawn avangin hmalakna tur leh bawhzui tur tam tak a la awm dawn a.
Pu Lalrochuanga Pachuau te chhungkuain Tanhrila cricket atana phal taka ram an hlan te nen thei tawpa bawhzui chhoh zel tum a ni.