Mizoram chhunga cricket inelna huanga sum che vel tam berna zing
ami leh leaque ngaihven hlawh ber zing ami Mapuia Memorial Mizoram Cricket Leaque (MCL) vawi 12 na Suaka Cricket Ground (SCG), Sihhmui a May ni 14, 2024 aṭanga khelh ṭan chu May ni 31 2024 ah final khelh niin MCL hmunruak leitu Chhinga Veng CC an champion.
Final hi Kulikawn CC leh Chhinga Veng CC te’n khelin Chhinga Veng CC te’n bat hmasain, over 20 ah run 117 an siam a, hei hi Kulikawn te’n umin over 17.2 ah run 75 siamin an out vek a, 3C te hi run 42 in an chak ta a ni. Final ah hian run 10 siama, over 4 a, run 9 chauh pe a, wicket 4 la tu Hunthar tlangval B.Lalnunfela chu MoM ah thlan a ni.
MCL khel tur hian 1st Division screening tournament a top 4 – Chanmarians CC, Kulikawn CC, Ramhlun Venglai CC leh Ṭhuampui Chinari CC te an tling sa a.
Hmunruak dang pahnih hi Zarkawt Lords CC leh Chhinga Veng CC te’n chuhpuitu awm loin ₹150000/- ve ve in an lei a ni.
MCL a champion team hian nuai 3 an dawnga, Runners up team in nuai 2 an dawng bawk; a hniam ber pawhin nuai 1 an dawng. Player of the Tournament hian cheng sing 5, Best Batsman leh Best Bowler te hian cheng sing 2 ve ve an dawng bawk.
MCL hi t20 format a khelh niin, match zawng zawng SCG, Sihhmui ah khelh a ni a, May ni 14 aṭanga May ni 31 inkar khelh a ni.
Team 6 te hi an inkhelh kual vek hnuah a sang pali te’n Qualifier 1 (table a sang 2) Eliminator (table a 3 na leh 4 na) leh Qualifier 2 (qualifier 1 a chak lo zawk leh eliminator ah chak zawk) hmanga final lut tur hi zawn a ni.
Result
Champion Team – Chhinga Veng CC
Runners up Team –
Kulikawn CC
Player of the Tournament –
Lalhmangaiha, Zarkawt Lords CC (innings 7 ah run 167 a siama; innings 6 ah wicket 11 a la bawk)
Best Batsman – Jehu Anderson, Chhinga Veng CC (Innings 7 aṭangin run 242 a siam)
Best Bowler –
Rinsangzela Hnamte, Zarkawt Lords CC (Innings 7 aṭangin wicket 12 a la)
Man of Match in final match –
B.Lalnunfela, Chhinga Veng CC (10 runs & 4 wickets)