Mizoram chhunga cricket inelna huanga sum che vel tam berna zing
ami leh leaque ngaihven hlawh ber zing ami Mapuia Memorial Mizoram Cricket Leaque (MCL) vawi 12 na chu May ni 14, 2024 hian Suaka Cricket Ground (SCG), Sihhmui ah khelh ṭan a ni dawn ta.
Hemi atan hian May ni 3 zan khan Aijal club ah player lilamna hun neih a ni a, player lei theiha chhawpchhuah 40 zingah player 20 lei an ni.
Heng player lei zingah hian Zemabawk Pitchers CC player nilai Vanlalpekhlua, Zemabawk chu player man to ber niin Chanmarians CC te’n ₹ 37000/- in an lei a ni. Player man to ber dawttu chu Venghnuai Raider CC player K.Lalṭhazuala, Maubawk Veng niin ₹30000/- a lei a ni.
Heng bakah hian MCL atana slot ruak pahnih leitu Zarkawt Lords CC leh Chhinga Veng CC te’n player lilam hi an duhzawng based price in an thlang thei a, Zarkawt Lords CC te’n thlang hmasain F.Vanlalmuanzuala, Bawngkawn South CC leh Lalhmangaiha, Luangmual CC te an thlang a.
Chhinga Veng CC te’n G.Lalbiakvela, Luangmual CC leh Marcus Lalpekhlua, Pacers CC te based price in an la bawk.
Hemi zana player leina ah hian ₹286600/- hman ral a ni bawk.
MCL khel tur hian 1st Division screening tournament a top 4 – Chanmarians CC, Kulikawn CC, Ramhlun Venglai CC leh Ṭhuampui Chinari CC te an tling sa a.
Hmunruak dang pahnih hi CAM club, district leh recognised club ni lo te tan pawha lei theih niin Zarkawt Lords CC leh Chhinga Veng CC te’n chuhpuitu awm loin ₹150000/- ve ve in an lei a ni.
MCL a champion team hian nuai 3 an dawng anga, a hniam ber pawhin nuai 1 an dawng ang. MCL 2023 champion lai hi Chanmarians CC te an ni.
Heng bakah hian transportation, jersey leh refreshment thlengin MCL team te hian an dawng vek dawn a ni.
MCL hi t20 format a khelh tur niin, match zawng zawng SCG, Sihhmui ah khelhin, May ni 14 a ṭana, June ni 1 a zawh tura ruahhman a ni.