Siaha District Cricket Association buatsaih cricket tournament “SDCA Cup 2024” ṭan a ni
February ni 20, 2024 chawhma dar 11 khan Siaha District Cricket Association (SDCA) buatsaih Cricket Tournament chu SDFA Playground, Meisatla ah ṭan a ni a, Pu Viasai Solo, E.E. PHED, Siaha chu khuallian niin tournament hi a hawng.
Pu Viasai Solo chuan cricket tui mite’n hmasawnna an neih zel theih nana buatsaih SDCA Cup 2024 chu lawm takin a hawng tih a sawi a. Cricket chu infiamna felfai leh thianghlim ‘Gentleman’s game’ tih a ni a, hmuh hniam theih a ni lo a ti. India rama sport discipline-ah chuan sum tamna ber a ni a, taihmakna nena theihtawp chhuahte tan chuan eizawn tling tak a nih avangin ṭhalai tam zawkin kan ngaihven a hun tak zet a ni a ti.
Pu Viasai Solo chuan SDCA te’n harsa tak chunga cricket khel ṭhinte hmakhua ngaia tournament an buatsaih chu ropui a tihzia lantir nan ṭanpuina sum fai SDCA hnenah hian a hlan nghal a ni.
SDCA Cup 2024 hawnna inkhawm hi Pu Reuben T. Kompa, Vice President SDCA chuan kaihruaiin, Rev. Lalthawhpuia, SDCA Executive Committee Member chuan hunserh a hmang a. Pu K. Beirathie, Secretary, SDCA in report pekna neiin Pu K. Lalsawmliana, Treasurer chuan lawmthu sawina neiin hun a khar a.
State Day a ṭan ‘SDCA Cup’ hi a ṭum thumna niin team paruk an tel a, ni 24 hian zawh tum a ni a, tournament hi t20 format a khelh a ni.
2023 -2024 season kal laiah hian SDCA te hian Dr. Rakhu Memorial Tournament leh Executive – Secretary Trophy te buatsaih tur an la nei bawk