Under-23 Multi Day Match, Col CK Nayudu Trophy khelh mek ah Mizoram U-23 ten Manipur U-23 te run 178 a hneh in Semi Final an lut.
Gujarat College Cricket Ground ‘A’ a khelh ah Mizoram bat hmasa in 1st innings ah bul an tan tha lo hle a, tun tournament khel tha tak Sahil Reza chuan run 61 siamin 1st innings a siam hnem ber a ni a, a tawp lamah Nasib Rai (20) leh Naveen Aayush Gurung (31) te an rawn khelh that zar ah run 181 an tlin hram a ni. Manipur lam bat ve in Sahil Sharma chuan wicket 4 la in Naveen Aayush Gurung chuan wicket 3 a la a an ni pahnih vawm that zar ah Manipur te run 152 lek ah an vawm out ta vek a ni.
Semi Final luh an tum chuan 2nd innings an khel that a ngai tih hria in Mizoram players ten 1st innings a an tih suam te siam tha in run 321 teh meuh an rawn tlin thei a 1st innings a wicket 4 latu Sahil Sharma chuan run 133 a rawn vaw chhuak a Johan Lalbiakkima (61), Nasib Rai (39) leh Bernard Lalhmangaiha (25) te an thawhhlawk takzet a ni. 1st innings a an lead na sa run 29 leh 2nd innings total nen Manipur lamin target sang tak run 350 an um a, 1st innings aiin hma rawn sawt hret mahse Johan Lalbiakima lo che in ani hian wicket 6 a la a, Rinsangzela (2 wickets) bakah K Vanrotlinga leh Captain B. Lalnunfela ten wicket 1 ve ve la in Manipur te run 172 ah an vawm out vek a Semi Final an lut ta a ni.
“Semi final kan thlen theihna tura a pawimawh ber chu player te leh support staff te thawhho thatna piah lamah Pathian vang a ni. Nitin Pathian hnena inhlanna te neiin, kan titi ho na rah pawh a ni tel bawk. Tuna kan naute hi an tha em em vek mai a, a tir match 3 ah kha chuan chak zo lo mahila kan game khelh leh kan naute theihna en khan hei aia sang thleng thei hi kan ni tiin kan infuih mawlh mawlh a, chu chu kan naute pawh hian hria in, hemi hnu atang hi chuan an theihna zawng zawng hlanin thahnemngai takin an khelchho zel a, an inkhel boruak pawh hmuh a nuam chho zel a hetiang dinhmun hi kan thleng ta a ni. Kan khelh lehzel na turah mizoram mipui te minlo ṭawngtaipui turin kan sawm nghal bawk e.” – Ringzela (Manager)