Ranji Trophy khelh mekah Mizoram Team chuan Arunachal Pradesh an hneh. January ni 19 aṭanga khelh multi days format Ranji Trophy Anand a khelah ah Toss ah Arunachal Pradesh chakin bat hmasak an thlanga, 1st innings ah run 265 siamin an all out a, he innings ah hian Mizoram guest player Mohit Jangra chuan wicket 6 la in, guest player tho KC Criappa chuan wicket thum a la bawk.

Mizoram lamin bat ve lehin 1st innings ah run 323 siamin, run 58 in an lead thei a, guest player Agni Chopra chuan run 114 Mizoram tan hian a siam a, ani bakah hian guest player tho KC Criappa pawhin run 74 a siam bawk. Anni pahnih bakah hian local player Vikash Kumar-a’n run 58, HM Ralte in run 25 leh ‘CAM Cricketer of the Year’ nilai Joseph Lalthankhuma te’n run 24 an siam ve bawk.

Arunachal Pradesh hian 2nd innings ah run 134 chauh siamin an all out a, Mizoram lam a\angin guest player Mohit Jangra leh KC Criappa te’n wicket 5 ve ve an la a ni. Arunachal Pradesh Mizoram tan target run 77 an tuk a, Mizoram team lam hian harsa lutuk loin target run 77 hi wicket hnih chauh hloha um phain wicket 8 in hnehna an chang a ni. Hetah hian local player Lalhruaizela chuan run 39 siamin, Vikash Kumar-a’n run 26 a siam bawk.

He hnehna hlu tak Mizoram team in a chan chungchangah hian Mizoram Team Manager Pu Lalzuiliana chuan, “chakna kan chan chungchangah hian lawmthu sawina tur kan ngah hle a, kan hruaitute leh kan chhungte ṭawngṭaina rah a ni a tih loh theih loh a ni. Pathian venhimna hnuaiah kan players te an damtlanga, inhliam kan awm loa kan vannei hle a ni” tiin a sawi.

Mizoram Team hian khelh hmabak pahnih la neiin, Meghalaya leh Hyderabad te an la tum leh dawn a, January ni 26 – 29, ah hian Meghalaya an tum dawn a ni.