Senior Women’s Inter Zonal One Day Trophy 2023 – 2024 Tournament January ni 30 aṭanga February ni 9, 2024 a Baroda a khelh turah North East Zone team player 15 thlan zingah Mizo player pathum – Lalrinfeli Pautu, Vanlalremtluangi leh Ramengmawii te thlan an ni.
Hnahthial nula Lalrinfeli Pautu hi batter niin tun hnaia BCCI hnuai tournament ah local player zinga che ṭha pawl ber a ni a, Vanlalremtluangi hi Zemabawk veng niin ani pawh hi local player che ṭha ber zing a mi keeper-batter anih bakah ‘CAM Junior Cricketer of the Year nominees’ zing ami kha a ni bawk. Durtlang nula Ramengmawii hi ‘CAM Women Cricketer of the Year’ atana thlan kha niin, tun hnaia Mizoramin Bihar an hnehnaa thawhhlawk ber zing ami a ni bawk.
Anni pathum bakah hian Stand by player mi pathum zingah Ainawn Veng nula Lalrinmawii a tel bawk. Rinmawii hi Mizoram pace bowler ṭha ber tia chhal ngam niin tun hnai BCCI tournament bowler che ṭha pawl ber a ni. Tin, North East team ah Physio atan Abishag Vantluangpuii a tel bawk.
Heng North East team a tel te hi CAM chuan a lawmpuiin ṭha taka an khelh theih nan duhsakna sang ber a hlan a ni.