Cricket Association of Mizoram chuan 8th North East Cricket Development Committee Conclave leh 2nd Achiever’s Nite chu July ni 21, 2023 khan a thleng a. Programme hi Aijal Club ah neih a ni.
Hetah hian NECDC member Cricket Association 6, heng – Meghalaya Cricket Association, Arunachal Cricket Association, Nagaland Cricket Association, Manipur Cricket Association, Sikkim Cricket Association leh Cricket Association of Mizoram hruaitute inhmukhawmin chawhnu lamah rorelna neiin, thil pawimawh tak tak rel a ni.
Zan lamah North East state 6 aṭanga season hman zawh taka player ṭha te hnenah lawmman semna neih a ni.
He hunah hian Pu Zoramthanga, Mizoram Chief Minister chu khuallian a ni.
Lawmman hi category hrang hrang (Mipa Unders 16, 19, 25, Senior leh hmeichhia Unders 15, 19, Senior) team a player ṭha te hnenah (best batter, best bowler, best wicket keeper) lawmman sem a ni.
Heng bakah hian Special Award (Emerging player of the season leh Men’s senior ah Player of the season) sem a ni bawk.
Tin, plate group aṭanga elite group a kaichho Nagaland CA, Meghalaya CA leh Manipur CA te hnenah lawmpuina pek a ni bawk.
Heng lawmman sem zingah hian Mizoram/CAM aṭangin Thelma Laldinthari, Ainawn Veng in Under 19 Girls huangah Best Bowler lawmman a la a, mipa lamah Under 16 Boys huangah Johan Lalbiakkima, Ramhlun Venglai in Best Bowler lawmman a la bawk.