Board of Control for Cricket in India (BCCI) hnuaia India rama zone hrang hrang paruk (6) te inelna zing ami ‘ Senior Women’s Inter Zonal T20 Trophy’
khelh turah North East Zone Senior Women’s Team tur player 15 thlanchhuah a ni a, Mizoram chuan player thawh hnem berin, player pali (4) lai an thawha, tun ṭum hi eng level ah pawh Mizoramin player la thawh tam ber ṭum a ni.
North East Zone Team aiawh tura thlan te chu –
1. Lalhriatpuii, Armed Veng (spinner)
2. Lalnunmawii, Damdiai (all rounder)
3. Vanlalruatpuii, Tlangnuam Vengthar (batter)
4. ZD Lalnunhrili, Venghnuai (medium bowler)
NE Zone Team Assistant Coach atan R. Lalhlimpuia (Tetea), Ramhlun North chu thlan a ni bawk.
Anni bakah hian stand by player panga (5) zingah Vanlalremtluangi a tel bawk a ni.
Tournament hi November ni 26 aṭangin Guwahati ah khelh ṭan tur niin, hemi inbuatsaihna atan hian November ni 16 aṭanga ni 21 thleng camp neih tur a ni ang.
NE Zonal Selection Committee meeting hi November ni 5 khan neih niin CAM aiawhin Pu Lalfakawma Varte, Hony Secretary leh Pu Daniel Lalrinsanga Hmar, Women’s Selection Committee Chairman te an tel a ni.
Cricket Association of Mizoram chuan Mizo nula NE Zone aiawh tura thlan player te leh coach te hi a chhuangin duhsakna a hlan a ni.