Vawiin November ni 2 hian Senior Women’s T20 Trophy Plate Group Match chu khelh zawh niin Mizoram chuan Meghalaya wicket 5-a hnehin Final a lut
Nagaland Cricket Stadium, Sovima-a inkhelah hian Meghalaya Toss-ah chakin vuak hmasak an thlang a, over 18 chhungin run 59 siamin an all out a. Lalhriatpuii’n over 4 a vawmah run 7 pein wicket 3 a la a. Lalhmangaihsangi’n Wicket 3 la bawkin ZD Lalnunhrili, Sandhia Rai leh Unnati Naik te’n wicket 1 ṭheuh an la.
Mizoramin over 13 chhungin wicket 5 hlohin an Target an umpha a. Guest Player Ankita Bhongade chuan run 18 a siam a, Vanlalremtluangi’n run 18 siam ve bawkin Vanlalruatpuii’n run 12 a siam ve bawk.
Ti hian Mizoram hian an Group Match khel zovin ṭum 4 chakin ṭum 1 an chak lo a, table-ah pahnihna niin Final an lut a. November ni 4 Nilaini chawhnu dar 1-ah Group Match-a an hneh tawh loh Bihar nen an inkhel ang.