Cricket Association of Mizoram in ground a neih chhun
Suaka Cricket Ground (SCG) panna (approach road) – railway ho hmun/kutthlak tawpna aṭanga SCG main gate inkar kilometer chanve vel (450 meter) chu vawiin aṭanga khawih ṭan tum a ni.
Kawng hi inches 8 a chhaha siam tur niin, RCC tur a ni ang.
Kar hmasa lamah khan hnathawh theih tura kawng samfai a ni a, vawin September ni 7 aṭang hian a siam hna an ṭan ang.
CAM hian BCCI tournament thlen (host) tumin chak takin hma a la meka, chhun zan zawmin hnathawh tur ṭul leh bawhzui ngaite chak taka bawhzui mek a ni a, chumi atan chuan kawng ṭha pawh hi a criteria pakhat zing ami a ni.
He kawng hi Railway lam tichhiat anih avangin Apex Council chuan vawi tam tak anmahni siamṭhat tir tumin a dawr ṭhina, Aizawl DC hoin railway lam nen pawh meeting leh Joint Inspection te neih ṭhin a ni.
Amaherawhchu, hmalak an tum loh avangin Apex Council chuan Mizoram sawrkar a theih tawpin a dawr ṭhina, DC te, Minister te, PWD lam te dawra fehchhuah leh meeting te neihpui ṭhin an ni.
Aizawl DC kal tlanga hmalakna leh Mizoram sawrkar te hma min laksakna zarah beisei phak baka hmalakna hlawhtlingin, ngaihpawimawh sak kan ni a. Mizoram sawrkar cabinet meeting chuan CAM sum leh pai ngai loin, sawrkar ṭanpuinain kawng siamṭhat a remti ta hlauha, kawng ṭha tak CAM chuan a sum leh pai seng loin a neih theih phah dawn ta a ni.
Kawng hi Balaji Construction te’n an siam dawna, ni 7 chhung vela zawh tum niin, kawng pawh dan (block) hrih a ni ang.
Cricket Association of Mizoram (CAM) leh ṭhalai te hmakhaw ngaitu Mizoram sawrkar chungah CAM chuan thinlung takin lawmthu a sawi a ni.