BCCI U-23 Women’s One Day Trophy Plate Group Match hnuhnung ber chu vawiin ni 11 March, 2026 hian khelh niin Mizoram chuan Meghalaya run 14-in a hneh.
Chandigarh-a inkhelah hian Meghalaya toss-ah chakin vawm hmasak an thlang a. Mizoram-in over 46.2 chhungin run 177 siamin an all out a. Saihmingliani’n run 50 a siam a, Karie Chakma chuan run 41 siamin Malsawmtluangi’n run 32 a siam bawk. Captain Lalhmangaihsangi’n run 25 a siam ve bawk.
Meghalaya lamin an target umin over 49.2 ah run 163 siamin an all out a. Mizoram tan Margareth Malsawmliani’n wicket 3 a la a, Thelma Laldinthari leh ZD Lalnunrili’n ten wicket 2 ve ve lain Jacinta Lalṭanpuii’n wicket 1 a la ve bawk.
Tihian Group Match khelh zawh niin Mizoram, Sikkim, Nagaland leh Manipur te chuan Point 12 an hmu ṭheuh a, Net Run Rate (NRR) hmu sang ber Mizoram chu pakhatna-ah awmin Sikkim-in an dawt a. Anni pahnih hian March ni 13, Zirtawpni hian Final an khel ang a, Champion Team-in season tharah Elite Group-ah an kaisang ang.