BCCI hnuaia T20 inelna, Syed Mustaq Ali Trophy Plate chu vawiin ni 26 November, 2025 hian khelh ṭan niin Mizoram chuan match hmasa berah Nagaland chu run 16 in a hneh.
Deccan Gymkhana Cricket Ground, Pune-a inkhelah hian Nagaland Toss-ah chakin vawm hmasak an thlang a. Mizoram-in over 20 chhungin run 198 siamin wicket ruk an hloh a, Mizoram tan KC Cariappa (Outstation) chuan run 48(23) a siam a. Dawrpui Vengthar tlangval Jehu Anderson chuan run 41(23) siamin Sahil Sharma (Ṭhuampui) chuan run 36(27) a siam bawk. Captain Joseph Lalthankhuma’n run 33(18) siamin K. Vanrotlinga (19*) leh F. Vanlalmuanzuala (11*) te’n an rawn thawh ṭha hle bawk, anni pathum hi Ramhlun Venglai-a cheng vek an ni.
2nd Innings-ah Nagaland lamin over 20 chhungin run 182 tlin wicket 9 an hloh a. Mizoram tan batting lama che ṭha KC Cariappa chuan wicket 3 lain, K. Vanrotlinga leh TC Vanlalremruata (Thingsulthliah) te’n wicket 2 ve ve an la a. Karthik CA (Outstation) leh Sumit Lama (Bungkawn Vengthar) te’n wicket 1 ve ve an la bawk.
Mizoram hian an match hnihna atan ni 28, November (Friday) hian Sikkim nen an inkhel leh ang.