Vawiin December ni 21, 2025 hian BCCI Women’s Under – 19 One Day Trophy Plate khelh mekah
Mizoram leh Meghalaya te inkhelhin he match ah hian Mizoram history ah a hmasa ber ni turin Tlangnuam tleirawl Vanlalruatpuii chuan century a siam.
Ruatpuii hian ball 156 a hmachhawn aṭangin run 115 lai a siama, 6 run vawi 2 leh 4 run vawi 14 a vawchhuak a ni.
Tun tournament khelh mekah hian Mizoram hi la chak vekin final a lut fel tawha, December ni 23 hian he group a team ṭha bera ngaih Tripura nen final an khel ang.
He record ropui tak siamtu Ruatpuii vek hian BCCI Tournament tho T20 format bikah Mizo hmeichhe zinga run vawchhuak hnem ber record lo siam tawhin, October ni 27, 2025 khan Sikkim lakah ball 66 aṭangin run 92 a siam tawh bawk.
Cricket Association of Mizoram chuan hetiang player chhuanawm leh record ṭha siam thei Ruatpuii hi a chhuang takzet a ni.