BCCI Women’s U-19 One Day Trophy Plate chu vawiin ni 15, December 2025 hian Group Match hnihna khelh niin Mizoram chuan Wicket 3-in Tripura lakah hnehna an chang.
He inkhel hi Nagpur-a khelhin niin toss-a chak Tripura-in vuak hmasak an thlang a, over 50 chhungin run 153 an siam a. Mizoram tan Jessica Lalmuanpuii’n wicket 3 a la a. Florence Beihropathaingia-in wicket 2 lain, Jacinta Lalṭanpuii leh Zothanmawii Rokhum te’n wicket 1 ve ve an la bawk.
Batting lamah Mizoram tan Opener K. Lalnunfeli’n run 39 a siam a, Lalnunmawii’n run 27 siamin Karie Chakma chuan run 19 a siam bawk. Baby Lalhmangaihzuali (15) leh Vanlalruatpuii (11) te’n an thawh ve lehin over 48 chhungin an target umphain run 154 siamin wicket 7 an hloh a, Wicket 3-in hnehna an chang ta a ni.
Tihian Mizoram hian match hnih khel tawhin an la chak ve ve a, point 8 hmuin table-ah pahnihna an ni mek a ni. Anmahni ang thoa vawi 2 hnih chak Manipur chu NRR ah an phak lova, ni 17 December hian an inkhel ang.